Opinión

A calidade do aire

UN ESTUDO realizado por Ecologistas en Acción sobre a calidade do aire no Estado español, durante o ano 2015 e publicado este verán, aporta datos preocupantes do elevado nivel de contaminación atmosférica, que ademais vai en aumento, superando os niveis recomendados pola Organización Mundial da Saúde (OMS). O informe analiza datos recollidos en setecentas estacións oficiais de medición instaladas en todo o Estado e dos que se desprende que o 99% da poboación e o 95% do territorio estiveron expostos a altos graos de contaminación. Diante deste problema de tan fondo calado, alguén ten que mandar parar.

Dezaoito millóns e medio de persoas no Estado español respiran aire cuns valores de contaminación superiores aos legais

Cerca de cincuenta millóns de persoas respiraron aire contaminado, segundo as medicións da OMS. A normativa española é menos estrita, pero aínda así, dezaoito millóns e medio de persoas no Estado español respiran aire cuns valores de contaminación superiores aos legais e a contaminación atmosférica, de case dous terzos do territorio, afecta negativa e directamente aos cultivos e aos ecosistemas naturais. Os ecoloxistas aportan datos veraces e, con toda a razón, queren promover a gran freada.

Os contaminantes máis problemáticos, segundo este informe, foron as pequenas partículas en suspensión (de diámetro inferior a 2,5 micrómetros), con grande capacidade para introducirse nas vías respiratorias da poboación; o dióxido de nitróxeno, gas que envelena a quen o cheira e que procede da combustión dos vehículos a motor e das plantas eléctricas; o ozono troposférico, que se produce pola reacción entre si dos contaminantes que saen dos tubos de escape dos vehículos a motor, e o dióxido de azufre ou de sulfuro, gas incoloro cunha densidade dobre da do aire e que se produce coa combustión de produtos petrolíferos e a queima de carbón en centrais eléctricas e calefaccións.

A propia Axencia Europea de Medio Ambiente apunta un dato: no Estado morren prematuramente, cada ano, vinte e cinco mil persoas por mor da contaminación do aire. Falar, pois, de contaminación é falar de morte e de elevados custes sanitarios, un 2,8% do PIB español, segundo a OMS e a OCDE. É obvio que estamos diante dun mal de enorme magnitude e para erradicalo parece conveniente pensar na utilización doutro tipo de enerxías e na drástica redución do tráfico.

Comentarios