SE AS eleccións son as festas da democracia, este ano os galegos imos ter dobre ración de romarías, pero desas nas que os do palco son uns pregoeiros empalagosos e onde as peregrinacións non se fan detrás dun santo patrón senón cara unha mesa onde varios veciños con desgana comproban como metemos o sobre sorpresa na urna. A primeira cita festeira que imos ter, só dous días despois do lume purificador do San Xoán, vai ser coma ir de dobrete, porque todo o que vexamos de aquí ao 26-N vainos parecer que xa o vivimos a noite anterior. Ademais, como o peto xa non avulta tanto como o primeiro día de festa, máis dun partido vai ter que facer un sinpa, porque tanto gasto non hai 3% que o ature. Logo virá de novo a resaca electoral e, se como di a enquisa do CIS a maioría imos repetir combinado e marca de espirituoso, o máis lóxico é que se volvan repetir os pases de baile que estivemos vendo desde decembro pasado. E entrementres pasa o verán de verbenas e romarías auténticas, á volta de vacacións aos galegos vannos citar noutra festa democrática para decidir se o presidente que amagou con marcharse á francesa segue encabezando a conga ou se preferimos facer un corro de muiñeira, deses que tan difícil resulta coordinar cando xa está ben entrada a madrugada. Din que Galicia é a terra das mil festas e se cadra por iso non nos inmutamos por estas dúas que nos anuncian.
