Opinión

Setembro por xullo

NESTA ÉPOCA de cambio, todo segue de igual xeito no arranque do novo curso político como acabou o anterior. Goberno e PP insisten en alertar sobre un posible pacto entre PSOE e Podemos como o peor dos males; os socialistas perseveran en verse como única alternativa para mudar a situación; Podemos insiste sobre a corrupción que marcou sobre todo a última lexislatura e que lle permitiu emerxer; en Cataluña obstínanse nas mesmas posturas enfrontadas os defensores da unidade española e os rupturistas, cos indefinidos xogando un papel activo, e en Galicia porfían os populares na estabilidade como única razón, repiten os socialistas o seguidismo habitual e as mareas non conflúen en lugar común pola distancia entre o nacionalismo maioritario e o estatismo rebelde. É setembro, pero nada distinto de xullo, como se os cambios que se aventuran deran tregua ou máis ben faltaran argumentos.

Comentarios