Cando comezabamos a recuperarnos do malestar que Rosa Díaz espertou en Galicia trala súa calificación pexorativa dos galegos, parece que se quere cumprir aquel refrán de ‘a quen non quere caldo, sete tazas’, e temos que oír a Arcadi Espada chamándonos pueblerinos, estúpidos, aldeanos, provincianos e nulos en intelixencia. Case nada. O xornalista di que non se referíu a tódolos galegos, senón só a aqueles que reaccionaron con enfado ás declaracións da líder de UPyD. O que me parece incrible é que aínda non se enterase de que foron os galegos en xeral os que reaccionaron; non un grupúsculo nacionalista radical nin os votantes dun só partido. No enfado non houbo unha soa cor nin unha soa ideoloxía. Eran simplemente persoas cun sentimento común de pretenza a un lugar. Por unha vez, todos estiveron dacordo. Algo digno de lembrar. O señor Espada, erre que erre, non acaba de ver que aquí a única pouco intelixente foi a señora Díez, que lonxe de rectificar e desculparse colleu o camiño do orgullo e reafirmouse unha e outra vez. A el viralle de perlas o de polemizar (non hai nada que desexe máis un comunicador que que se fale del, aínda que sexa mal), pero é de esperar que ela pague nas urnas a súa metedura de zoca. Igual entón decide desdicirse. Ou igual non, que con este tipo de xente nunca se sabe...