A Comisión pola Recuperación da Memoria Histórica organiza a Terceira Marcha Cívica pola Supresión da Simboloxía Franquista na Coruña, que se celebrará o sábado a partir das 12.00 e contará coa presenza de catro magos que a farán “desaparecer”.
A marcha partirá da praza de Cánovas Lacruz e irá ata María Pita para terminar na de Millán Astray e a Comisión solicitou “a axuda” do coñecido mago Antón e dos magos Romarís, Martín Camiña e Cali “para que fagan desaparecer a simboloxía maxicamente, xa que non se cumpre a lei”.
O mago Antón preferiu non desvelar o seu número, pero sinalou que “os magos fan posible o imposible e crean ilusións”, algo necesario “na cidade con máis simboloxía franquista de España”.
Así, apuntou que será un número “con poesía e intelixencia”. “Millán Astray dicía ‘Viva a morte e morra a intelixencia’, e nós dicimos viva a intelixencia e fóra a ignorancia”, sentenciou.
Antón considerou que os coruñeses recibirán a iniciativa “de bo grado” porque “a simboloxía se debe ir eliminando con naturalidade, “xa que non achega nada”.
Reivindicación de Vello
A Comisión pola Recuperación da Memoria Histórica xa presentou unha moción no Concello para que se recoñezan as “graves violacións de dereitos humanos” cometidas entre 1936 e 1975 en España, que “honre a memoria” dos que sufriron “inxustizas e agravios” por motivos políticos e ideolóxicos e que retire toda a simboloxía franquista existente na cidade en nomes de rúas, escudos en edificios públicos e estatuas.
02/07/2008
Actualidad