O Pontevedra Club de Fútbol está a asentar o plantel da temporada 2017/18 sobre a mocidade. A dirección deportiva da entidade está a apostar por xogadores novos, pero con cualificación e experiencia para afrontar importantes retos. Case todos eles, ademais de ter unha curta idade, formaron parte de canteiras do fútbol profesional ou competiron en escadras de referencia da categoría de bronce, o que pon de relevo o salto de calidade polo que está a apostar o Pontevedra co fin de que o seu primeiro equipo siga sendo competitivo no exercicio 2017-18.
Un dato resulta revelador: dos 14 homes que xa ten en plantel o club, ningún supera a barreira dos 30 anos de idade. Así, dos xogadores que estaban por enriba dos 30 anos na campaña pasada, ningún seguirá e aínda non obtiveron relevo xeracional.
Capi, Adrián Gómez, Dani Portela, Gonzalo e Iker Alegre foron os cinco futbolistas con máis de 30 anos que ficharon no curso pasado pola entidade de Pasarón. De momento, entre os 14 elixidos, ningún ten esa cifra e só un, Mouriño, a alcanzará durante o desenvolvemento da temporada.
O mellor Formación de base A meirande parte dos 14 xogadores do PCF proceden de canteiras importantes
A entidade xa conta con tres sub-23 para a próxima campaña. Son os homes que teñen menos experiencia. David Castro e Anxo Pérez debutarán na competición. O cuntiense tivo no Céltiga, a pasada campaña, o maior reto da súa carreira balompédica, mentres que o arqueiro nicrariense ascendeu co Fabril Deportivo a Segunda División B hai unhas semanas, aínda que tivo un rol secundario no colectivo.
Bruno, o terceiro sub-23, sacou o doutorado no curso pasado, no que xogou 30 partidos no propio Pontevedra Club de Fútbol.
Entre as fichaxes, destaca o currículo de David Goldar, que debutou en Primeira, xogou no Celta B e este ano na Ponferradina.
Víctor Mongil, formado no Valladolid, con paso polo Atlético de Madrid B e varias temporadas de alta esixencia no Mérida e no Alcoyano, non se verá sorprendido pola presión aos 24 anos.
Adrián León, futbolista con pasado no Racing do Santander e que as dúas últimas campañas estivo no Logroñés, será un dos veteráns, con preto de 28 anos.
Un máis ten Marcos Álvarez, que goza de ampla experiencia en play-offs no Racing de Ferrol, club no que se criou e co que disputou dous play-off de Segunda B e dous de Terceira División.
Jon Etxaniz foi un cachorro do Athletic de Bilbao, antes de comezar a súa ampla traxectoria por equipos vascos, algúns tan importantes como o Barakaldo.
Esas son as novas adquisicións, polo de agora, do conxunto granate: futbolistas que teñen unha gran marxe de mellora, con fame deportiva e con experiencia, a pesar da súa xuventude.
