ÚLTIMA HORA

Un fuerte terremoto sacude Ciudad de México

de actualidad
foto Donald Trump
 
Votacion: 
No hay votos
Pontevedra 0

Universitarios detrás dos trampantollos

O Concello de Pontevedra desvela a autoría das intervencións en cinta azul que levaron o espírito de Casares a varios espazos da cidade. Alumnos de Belas Artes e Ciencias Sociais encargáronse do traballo durante tres madrugadas para favorecer o factor sorpresa

Intervención no paseo de Montero Ríos (A galiña azul). GONZALO GARCÍA

Intervención no paseo de Montero Ríos (A galiña azul). GONZALO GARCÍA

Fixáranse nunha enorme galiña azul que apareceu dun día para o outro no paseo de Montero Ríos, mesmo cubrindo parte da fachada do instituto Valle Inclán, elaborada con cinta adhesiva pegada no chan? E nun debuxo da praza da Pedreira que simulaba un refacho de vento? Eran dúas pistas para a intervención definitiva, a do retrato de Carlos Casares, feito coa mesma técnica, que loce na praza de Barcelos desde a mañá do 17 de maio.

Era un segredo a voces e onte confirmouno o concelleiro de Normalización Lingüística, Alberto Oubiña: tratábase dunha iniciativa amparada polo Concello e executada por seis alumnos de Belas Artes, Comunicación Audiovisual e Publicidade. "A idea partiu do vicerreitor do campus, Juan Manuel Corbacho, e pareceunos moi interesante porque se tratou dunha acción alternativa para reivindicar de xeito diferente a Carlos Casares", o autor homenaxeado nesta edición das Letras Galegas.

Os estudantes plasmaron a idea e o Concello colaborou achegando o material e poñendo os espazos públicos á súa disposición. É así que Oubiña mesmo pediu desculpas "a quen me preguntou se sabía algo deste asunto e lle dixen que non". Porque, insiste, un dos obxectivos primordiais era crear "un factor sorpresa" e promover "un ruxe ruxe" entre a cidadanía. E conseguiuse. "A idea funcionou —afirma Daniel Alonso, un dos alumnos implicados—. Pasei por Montero Ríos para ver a reacción da xente e vin unha rapaza explicándolles aos seus amigos o que significaba. E nas redes sociais tamén tivo repercusión. Iso é o que queriamos".

"Teñen moito mérito —subliñou Oubiña—. Estiveron traballando desde as doce da noite ata que se fixo de día". A primeira intervención fíxose na madrugada do 3 ao 4 de maio; a segunda, do 7 ao 8 e á terceira do 16 ao 17.

Alejandra Ianonne sinalou que se utilizou unha cinta que non supón ningún dano para o pavimento nin para as fachadas, aínda que "é máis difícil para traballar".

Alonso detallou que a intención era homenaxear a Casares a través das súas obras máis emblemáticas e que elixiron os trampantollos en vez dun mural vertical "como unha perspectiva distinta para chamar á atención da xente e crear interese na cidadanía". O retrato elaborado en Barcelos supuxo máis dificultade técnica. O traballo levouse a cabo coa axuda dunha cámara que simulaba o punto de vista do ollo humano e unha pantalla que marcaba o deseño no chan a través de punto. Un vídeo recolle a ardua tarefa. A intención é que as intervencións permanezan na rúa ata o vindeiro 1 de xuño. Oliver Alonso, Adrián Abilleira e Sabela Argibay completaron o equipo.

Comentarios

fotoLos comentarios enviados fuera del horario de moderación, serán aprobados al día siguiente.

Serán borrados los comentarios que contengan insultos y/o contenidos inadecuados. Para cualquier duda, consulta la guía de comentarios.