de actualidad
Fotografía de Salvador Dalí Salvador Dalí
► PROGRAMACIÓN 
Votacion: 
5 (2 votos)
Pontevedra 0

Pontevedra homenaxea a Carlos Casares

O autor ourensán deixou a súa pegada en Pontevedra. Fíxoo da man do escultor César Lombera, que o esculpiu xunto a Castelao, Bóveda ou Cabanillas unha tertulia no Café Moderno

Escultura de Carlos Casares na Praza de San Xosé. LAURA GARCÍA

Escultura de Carlos Casares na Praza de San Xosé. LAURA GARCÍA

Máis apegado a Ourense, Santiago ou Vigo, Carlos Casares (Ourense, 1941 -A Ramallosa, Nigrán, 2002) deixou a súa pegada en Pontevedra. Fíxoo da man do escultor César Lombera, que o esculpiu xunto a Castelao, Bóveda, Cabanillas, Paz Andrade e Quiroga nunha tertulia do Café Moderno. A peza, artellada arredor dunha idea de Lores e do ex-concelleiro socialista Roberto Taboada, quería homenaxear aos intelectuais do século XX habituais nas conversas do café pontevedrés. Fíxoa Caixa Galicia e quedou inaugurada en 2006 na Praza de San Xosé. No interior do propio Moderno consérvase unha réplica a cor, que habitualmente está no interior da cafetería, aínda que estes días foi trasladada ao primeiro andar co gallo dunha actividade realizada polo Día das Letras Galegas. Velaí a presenza permanente de Carlos Casares en Pontevedra, unha presenza que hoxe se incrementa co 17 de maio a el adicado.

Flores, música e textos literarios servirán para homenaxear ao autor distinguido pola Real Academia Galega. O acto central en Pontevedra corre a conta da asociación socio-cultural O Burgo Como vén sendo habitual, o colectivo montará unha alfombra floral na honra do autor na Praza de Curros Enríquez. Diante dela terá lugar, a partir das 19.30 horas, un acto no que se contará con actuacións musicais, discursos e lectura de textos. Un grupo de gaitas, a Coral de Sobradelo (Vilagarcía), o Coro do Burgo e a Banda de Música ocuparanse da parte musical. O presidente de O Burgo e o alcalde da cidade lerán cadanseu discurso. Ademais, distintos persoeiros e cidadáns participarán nun recitado colectivo.

XEVE. A celebración do Día das Letras Galegas en Pontevedra volverá contar coas partidas simultáneas de xadrez na Praza de Santa María, dende as 10.30 horas. A actividade, organizada pola asociación de veciños Santa María e pola Escola de Xadrez de Pontevedra, é xa tradicional nesta data. O que é unha novidade é a incorporación da parroquia de Xeve á celebración cun programa propio de propostas.

Pola mañá, ás 10.00 horas, realizarase unha andaina ao Pazo Gondar, dende o Centro Cultural de Santa María. "Leva a túa poesía para a lectura", pregan os organizadores. Despois, cara as 14.30 horas, terá lugar un xantar popular (para o que se precisaba de inscrición previa).

Á tarde haberá unha lectura dramatizada na honra de Carlos Casares, na que participará a violinista Marina Hermida. Será ás 16.30 horas. Tamén no Centro Cultural de Santa María terá lugar un concerto do Coro de Xeve ás 19.00 horas. A programación, organizada por Sondexeve, inclúe ademais xogos populares toda a xornada.

A todas as propostas que se levan a cabo en Pontevedra hai que sumar as da comarca e do resto da provincia. Poio, Marín, Bueu e Sanxenxo, entre outros concellos, celebran o Día das Letras Galegas con actividades propias.

En Poio hai propostas en Raxó e en Combarro. En Marín, o Museo Manuel Torres acollerá ao mediodía a entrega dos premios dos certames de poesía para escolares e para adultos, organizados polo Concello. Seguidamente, o Ateneo Santa Cecilia convocará o III Certame de Relato Curto. En Bueu celébrase a Romería das Letras Galegas de Sanamedio (Bon, Beluso), no que terá especial protagonismo a poetisa Miriam Ferradáns, natural de Bon. Entre outros, actuarán o Grupo de Danzas Pais de San Roque con Os Liboreiros e o Grupo Folclórico Anaquiños.

Finalmente, en Sanxenxo, baixo o título xenérico de Casares e Cantares, terá lugar unha lectura pública de textos do escritor a quen este ano se lle adica o Día das Letras Galegas. Será o alcalde, Gonzalo Pita, o que abra a lectura na que participarán varios membros do Goberno local e á que están convidados todos os integrantes da Corporación e os veciños en xeral. Trala lectura pública darase paso á actuación do grupo Onte e Hoxe, que interpreta temas en lingua galega.

Comentarios

fotoLos comentarios enviados fuera del horario de moderación, serán aprobados al día siguiente.

Serán borrados los comentarios que contengan insultos y/o contenidos inadecuados. Para cualquier duda, consulta la guía de comentarios.