A 'Facultade da Compostaxe' reúne aos líderes do compost

A Deputación de Pontevedra reunirá a próxima semana na Facultade da Compostaxe aos expertos internacionais de máis renome na actualidade sobre o tratamento do lixo orgánico e o compost: o ideólogo e fundador do chamado modelo austríaco, Florian Amlinger, e o técnico director de compostaxe de todo o Norte de Italia, Michele Giavini. Ambos impartirán leccións maxistrais aos 20 aspirantes a mestres e mestras composteiras do Plan Revitaliza da Deputación, na que se pode considerar como a semana de maior nivel docente de todo o curso de formación.

Segundo informaron o sábado fontes da institución provincial, Florian Amlinger é un enxeñeiro austríaco de grande currículo que ten publicado diferentes publicacións científicas. "Xunto con outros colegas considérase o pai e ideólogo do modelo austríaco de compostaxe, no que se inspira o Plan Revitaliza de compostaxe da Deputación, que aposta polo tratamento in situ dos residuos orgánicos a través de composteiros individuais e centros de compostaxe comunitarios".

O elemento distintivo do modelo austríaco é que rexeita a creación de infraestruturas para tratar os residuos que non poden ser compostados nin en centros individuais nin en centros colectivos. A solución que se propón, e que a Deputación comparte, pasa por chegar a acordos con empresas do sector agropecuario, que perciben por esta tarefa un canon ou outro tipo de acordo económico. "Así, afórrase a necesidade de crear novas plantas de tratamento específicas para o lixo municipal, a tramitación administrativa que supón, así como o posible rexeitamento veciñal por novas instalacións vencelladas co lixo", subliñaron as mesmas fontes.

Por outra banda, estará o italiano Michele Giavini, técnico responsable da dirección do plan de compostaxe de todo o norte de Italia, así como o director de planificación da Axencia de Residuos de Cataluña e enxeñeiro agrónomo, Francesc Giró; o técnico fundador da axencia de estudos ambientais e residuos Spora, Frederic Puig, e o técnico de residuos do Concello de Usurbil, Ibon Goikoetxea, cuxo municipio ten os mellores datos de reciclaxe de todo o estado español e practicamente de Europa.