PDF

Ver la portada de hoy

de actualidad
foto J. Mª Aznar
 
Votacion: 
No hay votos
0

Susana López Abella: "Todos podemos errar, pero é mellor evitar seguir teimando e reiniciar canto antes"

Susana López Abella é a secretaria de Igualdade desde 2012. En defensa da Rede CIM, criticou a Ponte Caldelas polo peche do servizo e aínda pide a apertura tras meses de controversia, tensións e dunha sentenza que anula os despidos. "Estou disposta a axudar e apoiar", di, "só importan as usuarias e os seus nenos"

Susana López Abella. GONZALO GARCÍA

Susana López Abella. GONZALO GARCÍA

Ponte Caldelas vén de anunciar que apelará contra a sentenza que obriga a readmitir ás traballadoras do CIM. Como valora o fallo xudicial?

É contundente. Deixa claro que o Centro de Información á Muller é unha competencia municipal, un servizo necesario e que debe ser especializado. Di textualmente "no se comparte la afirmación de la demandada de que no se trata de un servicio esencial y (...) no es competencia del Concello sino de la Comunidad Autónoma, pues parece difícil asumir que la regulación en materia de igualdad sea ajena a cualquier entidad territorial". O xuíz insiste e di que non se pode separar Igualdade dos Servizos Sociais, que son competencia municipal.

O Concello ve que lle dan a razón ao falar de irregularidades nas contratacións anteriores...

Non entendo como poden pensar que lle dan a razón nalgo, porque é contundente: declara nulo o despedimento, a existencia de relación laboral, e condena á readmisión nas mesmas condicións que antes. Ademais, obriga a restituir os soldos que terían percibido as traballadoras desde xaneiro e a indemnizar con 5.000 € a cada unha por danos morais...

Díaz pregúntase como cumprir as condicións da Ley Montoro que impiden incorporar novo persoal...

Insisto, o fallo é claro: "Declaro la exitencia de relación laboral entre las partes y la nulidad (...) y a su readmisión en las mismas condiciones que tenían antes de producirse el despido". Tiñan relación laboral antes.

Con respecto ao recurso ante o TSXG, é unha manobra dilatoria?

Están no seu dereito de presentalo e nós respectámolo.

"Ata o momento non se enviou a resolución de extinción, esperando a que o Goberno de Ponte Caldelas recapacitase"

É posible que se declaren medidas cautelares e se incorporen as traballadoras a pesar da apelación?

É unha cuestión xudicial, non podo falar sobre iso. Descoñézoo.

Como actuou o departamento que dirixe desde o peche?

Unha vez que cesou o servizo, abrimos o expediente para desacreditar o CIM. Non quedou outra opción. Abriuse un prazo de audiencia e déronse quince días para que participaran, pero non contestaron.

Está oficialmente extinguido?

Ata o momento non se enviou a resolución, esperando que o Goberno de Ponte Caldelas recapacitase.

Cabe esperar agora que esa resolución siga no limbo?

A Administración autonómica non pode estar no limbo, do mesmo modo que non poden estar no limbo a atención ás mulleres e os CIM. Esta sentenza recoñece a importancia de ter preto os servizos e os tempos que vivimos coa violencia de xénero son terribles...

Actualmente hai unha avogada atendendo aos veciños. É posible que non se note a diferenza entre esta fórmula e un CIM?

Como non se vai notar? Un CIM está acreditado por un decreto co que a Xunta establece que ten que haber unha atención mínima diaria para as usuarias cunha graduada en Dereito e unha licenciada en Psicoloxía. Desde o momento en que non hai especialización en igualdade e violencia de xénero é imposible. Ademais, segundo teño entendido, agora hai unha atención de catro horas á semana. Non se poden abrir gabinetes e non cumprir os requisitos esixibles: instalacións, gardar a intimidade, un horario...

"Non entendo como (o alcalde) pode pensar que lle dan a razón nalgo. A sentenza é contundente en todos os puntos: declara nulo o despedimento"

Que hai que facer para reabrilo?

Para este concello e outros que queren abrir de novo é sinxelo: hai que acreditar a contratación dos profesionais citados, como mínimo, e demostrar que os locais son axeitados. Desde o momento en que comeza a actividade, hai dereito a subvención.

Ponte Caldelas reclama que se racionalice o mapa dos centros...

Os concellos saben xestionar os seus recursos e coñecen a problemática do seu territorio e nós respectamolos. Se eles queren mancomunarse poden. A Lama, por exemplo, integra a Cerdedo-Cotobade e Fornelos de Montes. O feito de compartir o servizo fai que se incremente a subvención. Ponte Caldelas recibiu 27.000 euros, mentras que A Lama recibiu 44.000 euros. Lalín tamén atende a Agolada e Rodeiro e percibiu 52.000 euros. Ademais, se Ponte Caldelas quere cambiar o modelo, non ten que facelo desde fóra pois ten á Fegamp, que é un magnífico instrumento de cooperación co que temos un convenio que funciona moi ben e que é unha canle de diálogo.

Ponte Caldelas insiste en que cinco días á semana é demasiado para menos de 6.000 veciños...

Tratan de xustificar o inxustificable, que é o peche, comparándose con Pontevedra, con Soutomaior... Non precisa compararse. Cada concello ten pecularidades propias. Fíxese, as traballadoras atenderon o ano pasado a 138 persoas e recibiron 525 consultas.

Falando do alcalde, o debate tornou tenso con el. El insiste en que a secretaria xeral lle debe pedir perdón por chamarlle machista... As posturas persoais son un freo neste caso?

Eu son unha servidora pública, estou á fronte dun departamento e teño que velar por que haxa igualdade en todo o territorio e por que os que o precisen sexan atendidos. Estou a disposición de Ponte Caldelas nesta materia e noutras relativas á igualdade. O noso obxectivo ten que ser a atención á cidadanía e o demais sobra. Todos podemos errar, como creo que se errou con este peche, pero é mellor evitar as teimas políticas e reiniciar canto antes. Eu estou disposta a apoiar e axudar para a posta en marcha, a asesorar co noso equipo se queren mancomunalo, se queren agrupalo, se queren seguir en solitario... Insisto en que respectamos a decisión de presentar recurso, pero o máis sensato sería que puxera o servizo en marcha de novo. O único que importa son as usuarias e os nenos. Vivimos unha situación moi complexa e precisamos todos os recursos posibles. Esta semana, por desgraza, temos novos motivos para reflexionar sobre isto.

Comentarios

fotoLos comentarios enviados fuera del horario de moderación, serán aprobados al día siguiente.

Serán borrados los comentarios que contengan insultos y/o contenidos inadecuados. Para cualquier duda, consulta la guía de comentarios.