Un dos obxectivos que se marcou este ano o Goberno municipal foi lograr que a emblemática Romaría de San Vicente volvese a lucir en todo o seu esplendor. Despois de varias edicións nas que a afluencia de público non foi precisamente notable, o evento de Parada experimentou este domingo un importante pulo con respecto a citas pretéritas.
Ao carón da ermida instalouse unha carpa con 80 mesas e capacidade para preto de 1.000 persoas que se encheu completamente, ata o punto de que todas as mesas xa estaban reservadas con anterioridade. Unha delas estivo encabezada polo alcalde, Andrés Díaz, quen estuvo acompañado do tenente de alcalde, Enrique Vidal, e da concelleira Pilar Couto. O menú estivo composto de polbo á feira, carne ao caldeiro e cacheira. A romaría contou tamén coa actuación dos grupos musicais Nós tamén imos e Os Centellas, un deles financiado con cargo ao Plan Cultural do Concello de Ponte Caldelas. Anteriormente, celebrouse a misa en honra a San Vicente o Pequeno, ás 13.00 horas, e a tradicional procesión. A xornada rematou pola tarde coa actuación da charanga Charandonga.
A pesar das baixas temperaturas, a asistencia foi unha das máis altas dos últimos anos, un feito que foi salientado polos impulsores dunha iniciativa que aspira a continuar medrando en vindeiras citas.
HISTORIA. O alcalde de Ponte Caldelas subliñou que antigamente esta festa era xornada festiva local en Ponte Caldelas e era necesario revitalizala. O Concello tamén se ocupou de todo o acondicionamento e limpeza do torrado da festa, así como da recuperación do manancial que alimenta a fonte e o pozo de Santa Marta, arrodeado de tradición e lenda, pois dise que no fondo desta poza ocultaba unha grade de ouro un labrego de Taboadelo, famoso polas súas colleitas.
O Goberno local tripartito, formado polos grupos municipais do PSdeG-PSOE, Agrupación de Veciños de Ponte Caldelas (AVP) e Bloque Nacionalista Galego, está decidido a recuperar ao máximo as tradicións locais e a cita anual en San Vicente de Parada é unha das prioridades. Os dirixentes do Concello manterán a súa folla de ruta con outros eventos similares. Á cita do domingo acudiron veciños de diferentes localidades da contorna do Verdugo.
La Romería de San Vicente recupera su tradición en Ponte Caldelas
A implicación do Concello e as boas condicións meteorolóxicas axudaron a que un gran número de persoas participase no evento, que contou con actos relixiosos e gastronómicos
