A promoción da diversidade lingüística como unha vantaxe ou a erradicación dos prexuízos que rodean á lingua galega son dous dos obxectivos principais do ciclo de conferencias O galego é un mundo, promovidas pola Secretaría Xeral de Política Lingüística. Ambos eixes temáticos desenvolveranse a través da visión de Anik Nandi, un sociolingüista bengalí e experto en transmisión interxeracional, que ofrecerá ata 12 charlas interactivas con alumnos nas que disertará sobre a realidade sociolingüística de Galicia e da India.
O IES San Clemente de Santiago de Compostela foi o punto de arranque deste circuito de charlas. Alí, Nandi explicou como o bengalí, a súa "lingua materna", é considerada "minorizada" na India a pesar de contar con 260 millóns de falantes. "Moitas veces o número non importa. Non é cousa de números, senón da cultura, o agarimo, a historia...", insistiu o investigador, quen destacou a necesidade de abordar a diversidade lingüística "desde máis perspectivas".
Anik Nandi referiuse, ademáis, á "relación" entre o bengalí e o galego, linguas "irmás" que evolucionaron desde unha raíz común e contan con case 800 equivalencias "co mesmo significado", en palabras "tan comúns como 'chave' ou 'xanela'".
En declaracións aos medios, o secretario xeral de Política Lingüística, Valentín García, sinalou que "a maior parte" dos países do mundo "falan varios idiomas", o que supón "unha riqueza inmensa" e "non un problema". Neste sentido, animou a erradicar os "prexuízos" que rodean á lingua galega e a traballar para convencer de que é "unha gran oportunidade" para conectarse con outros territorios e sociedades, ademais de "millóns" de falantes.
"É un dos eixos de traballo que queremos reforzar nesta nova etapa, traballar coas familias, concienciar de que un traballo moi importante se fai nos centros, pero que tamén hai outro moi importante no seno familiar", destacou. Ademais, referiuse á necesidade de "axudar e apoiar" aos neofalantes para que se "atrevan a acercarse á lingua galega", e confiou en que a visibilización de realidades sociolingüísticas distantes permita "aprender cousas" sobre a situación de Galicia.
DOCE PARADAS. Anik Nandi doutorouse na universidade de Edimburgo e traballou durante tres anos e medio nunha tese doutoral sobre a transmisión do galego de pais a fillos, ademais de investigador de MAEC-AECID entre 2008 e 2012. O ciclo 'O Galego é un Mundo' chegará posteriormente ao IES Félix Muriel (Rianxo), IES Carral, IES Manuel Murguía (Arteixo), IES Aquis Celenis (Caldas de Reis), IES Castro Alobre (Vilagarcía de Arousa), IES Carlos Casares (Vigo), IES Chano Piñeiro (Forcarei), IES Taboada Chivite (Verín), IES Cidade de Antioquía (Xinzo de Limia), CPI Plurilingüe Navia de Suarna y al IES de Ribadeo Dionisio Gamallo.
Un sociolingüista compara a situación do galego co bengalí, lingua minorizada con 260 millóns de falantes
Un ciclo de conferencias por colexios busca promocionar a diversidade lingüística como unha vantaxe e erradicar os prexuízos que rodean a lingua galega
