Valdés confía en que el PCF no tenga un bajón como el de la 2015/2016

"Estaría preocupado se nos sucedese o mesmo catro anos seguidos, e non é o caso", sostén o home de confianza de Luisito
Roberto Valdés (esquerda) dialoga con Luisito durante unha sesión de traballo en Príncipe Felipe.
photo_camera Roberto Valdés (esquerda) dialoga con Luisito durante unha sesión de traballo en Príncipe Felipe.

A preparación física sempre está en boca de todos, sobre todo cando hai que buscar culpables de resultados negativos e dinámicas desfavorables nos equipos. No Pontevedra Club de Fútbol a parcela é dirixida por Roberto Valdés, o home que acompañou a Luisito en tódolos ascensos de categoría que conseguiu. Valdés está preparado xa para comentarios, dúbidas e críticas, o seu pan de cada día. De feito, a afección, ilusionada coa posibilidade de pelexar novamente por unha praza de play-off de ascenso xa destapou os primeiros comentarios de escepticismo ao respecto das opcións do Pontevedra. Os seareiros cren que os resultados negativos que colleitou o PCF na segunda volta da pasada campaña poderían extrapolarse á actual.

"Xa me chegou ese rebumbio", recoñece Valdés a ese respecto. "Falábao co míster (Luisito). Estaría preocupado se nos sucedese o mesmo catro anos seguidos. Pero non é o caso. Iso si, fixemos unha primeira volta espectacular e manter o nivel non é sinxelo". O técnico fixo memoria para lembrar a súa traxectoria. "En Terceira División fixemos unha segunda volta espectacular, igual que tódolas temporadas que ascendemos con outros clubs", defende o preparador físico santiagués ao remate do adestramento deste luns do PCF en Príncipe Felipe. Na súa opinión, o apartado físico foi inxustamente criticado. "O que sucedeu o ano pasado puido ter un compoñente mental. A falta de oito xornadas para rematar perdemos en Logroño e quedamos a nove puntos do play-off. Parecía que sobraban os últimos encontros. Pero se gañásemos algún dos partidos que empatamos na casa, o final sería diferente".

"En Terceira fixemos unha segunda volta espectacular, igual que nas temporadas que ascendemos con outros clubs"

No segundo ecuador da campaña, Valdés espera regularidade nos futbolistas granates. "Intentaremos buscar unha liña constante, sen altibaixos. Alcanzar un nivel elevado e mantelo durante o maior tempo posible".

Ademais, o preparador físico amósase satisfeito co reparto de minutos dos futbolistas. "Temos o plantel bastante ben dosificado. Catro ou cinco acumularon moitos minutos, pero foron entrando máis futbolistas a medida que pasaban os encontros sen que o nivel baixase".

Iso si, é consciente tamén de que conservar o mesmo ritmo de resultados e xogo "non vai ser sinxelo. Non hai unha variña máxica que nos permita afirmalo, porque inflúen moitas variables: as lesións, o aspecto mental... pero o noso propósito é conservar esta liña na que se está a comportar o equipo. Non vemos motivo para que non poida ser así".

"Podes ter a tódolos futbolistas e saírche as cousas peor ou ter varios mancados e manter o nivel. O fútbol ten estas cousas"

O compañeiro de Luisito considera que a profundidade de banco vai axudar ao Pontevedra a ser máis competitivo. "A amplitude de banco, as lesións, o feito de estar clasificados na zona alta da clasificación... Son factores relevantes. Ninguén contaba coa baixa de Iker Alegre e seguimos competindo ben".

Iso si, tampouco é matemático. "Podes ter a tódolos futbolistas e saírche as cousas peor ou ter varios mancados e seguir ao mesmo ritmo. O fútbol ten esas cousas. Intentaremos controlar as variables que están ao noso alcance".

Más en Deporte Local Pontevedra
Comentarios