A Deputación de Pontevedra publicou onte no BOP as bases reguladoras do programa 'Conectadas 2016'. A partir deste martes e durante un período dun mes, os colectivos de mulleres e as entidades que promoven o seu desenvolvemento poderán presentar as solicitudes nos rexistros da institución provincial para poder optar ás 267 prazas ofertadas.
Conectadas 2016 está dotado con 321.433 euros e é unha "modificación radical" do anterior 'Pensa en ti', que, segundo o Goberno provincial, "ofertaba cursos non adaptados a unha sociedade do século XXI, como automaquillaxe, corte e confección ou cociña, no sentido máis tradicional da forma de entender a participación das mulleres no mundo".
O novo programa ten por obxectivo potenciar a participación e promoción das mulleres, favorecer o intercambio de experiencias en igualdade, impulsar accións formativas para contribuír a mellorar a empregabilidade da poboación feminina e o seu mantemento no mercado de traballo, facilitar o emprego da información e as novas tecnoloxías e incorporar de maneira transversal os principios de igualdade, corresponsabilidade e conciliación da vida persoal, laboral e familiar.
Os bloques de contido inclúen as seguintes propostas: 'Muller emprende: iniciativas sostibles para o emprego' (plan de negocio, community manager, e-commerce, asesoría laboral e fiscal e coaching), 'Muller e cultura: artes visuais' (fotografía, pintura, percusión e teatro, entre outras iniciativas), 'Actualízate '(correo electrónico, manexo da tablet, smartphone e redes sociais), 'Coas túas mans' (cestería, traballos en tea, coiro, madeira ou costura creativa), 'Porque ti o fas' (arte floral e ornamentación, sostibilidade, horta ecolóxica, etcétera), 'Súmate ó cambio' (hábitos saudables, conservación de alimentos, mantemento do fogar e xestión doméstica, corresponsabilidade doméstica e familiar, coida o teu vehículo e bricolaxe), 'Ponte en forma' (pilates, tai-chi, ioga e outras actividades) e 'Coidados persoais e saúde' (manexo do estrés, menopausa saudable, risoterapia e musicoterapia).
MÓDULOS DE 35 HORAS. As accións formativas deste programa, dunha duración de 35 horas, estarán abertas a toda a poboación da provincia e incluirán, de forma transversal, o tratamento da igualdade entre mulleres e homes a través dun módulo de sensibilización en igualdade de cinco horas de duración.
As mulleres terán preferencia á hora de inscribirse e o 25% das prazas estarán reservadas para homes, agás no bloque Súmate ó cambio, no que a participación pode ser mixta. Neste, a distribución das prazas será ó 50% para impulsar a participación activa e conxunta de mulleres e homes nas cuestións que se desenvolven no ámbito privado.
