Aproxímase a XVI Feira Franca de Pontevedra e os nervios xa están no aire. Este ano, as datas escollidas para a celebración da festa medieval serán o 4 e 5 de setembro e contemplarán diversas exhibicións como a cetrería, o tiro con arco ou o gran torneo medieval.
A Feira Franca, que ten lugar na zona monumental da capital do Lérez todos os anos na primeira fin de semana de setembro, toma forma dende o ano 2000 e foi declarada Festa de Interese Turístico pola Xunta de Galicia en 2013.
Cada ano, centos de persoas se visten de época para conmemorar privilexio concedido a Pontevedra polo rei Henrique IV, no ano 1467, en virtude do cal se autorizaba a celebración dun mercado libre de impostos dun mes de duración tomando como escenario a cidade vella.
Para que os máis pequenos se vaian enchendo do espírito medieval, o Concello organizará tres obradoiros nos eventos previos á Feira Franca desde o 17 de agosto ao 1 de setembro.
As persoas interesadas xa poden inscribirse por teléfono (986 860 587) ou na propia oficina da Feira Franca da rúa Alfonso XIII (ao carón da biblioteca pública).
