O presidente da Real Academia Galega, Xesús Alonso Montero, mostrou este xoves en Pontevedra un anticipo de Xosé Filgueira Valverde. Biografía intelectual, da que é autor, e que se centra na faceta cultural do homenaxeado este ano no Día das Letras Galegas.
A presentación desta biografía celebrarase oficialmente o 27 de abril no sexto edificio do Museo de Pontevedra, cidade natal do homenaxeado este ano, pero este anticipo débese ao interese por que estea presente na Feira do Libro Novo que se celebra estes días, segundo explicou Manuel Bragado, director da editorial Xerais.
O fillo do homenaxeado, Fernando Filgueira, tamén acudiu á cita na cidade do Lérez, onde recoñeceu o esforzo que supón recoller nunha obra "oitenta anos de vida pública" do seu pai e a importancia do contexto histórico no que se relatan os feitos, e a partir de aí, "cada un saca as súas conclusións", explicou.
A biografía resta importancia aos episodios máis controvertidos da súa vida, como o seu posicionamento político nos anos da Guerra Civil, para centrarse na obra de Valverde, "un capítulo esencial da cultura galega moderna e contemporánea", segundo recalcou o propio Alonso Montero.
O presidente da RAG fixo fincapé na súa relación fraternal con Filgueira Valverde, quen "sabía que eu non compartía o seu ámbito ideolóxico", e niso, dixo, reside "a súa grandeza".
Respecto deste trazo do homenaxeado, Montero insistiu en que Filgueira Valverde "foi fiel" á súa moral e que foi capaz de "erosionar" o réxime de Franco "desde dentro", ao falar por primeira vez en galego dentro das Cortes franquistas.
Montero insistiu así na importancia da obra de Filgueira Valverde, "un mito" para todos os profesionais da literatura medieval, que partiron do seu traballo en 1949 para facer as achegas que actualmente se coñecen sobre a materia.
Ademais do seu "compromiso con Galicia", puxo o acento sobre o seu traballo sobre a figura de Camões.
As súas achegas para pór en valor a cultura galega convérteno en "o último polígrafo da nosa lingua", dixo Alonso Montero.
O autor dixo que non está "insatisfeito" co resultado da obra, pero confesou que lle tería gustado "ter dous meses máis de prazo" para completar a biografía; "pensei que sabía bastante" pero ao investigar algúns aspectos da súa vida "fun de asombro en asombro", confesou Alonso Montero.
